Es heert net uff zu bassiere: Vun Windräder, annere Windmacher unn emm Udo

Also de Karl hat gemeent, dass ma driwwer dischbediere kennt, ob mir in Zweebrigge a so riesiche Windräder breichte, wie se zum Beispiel drowwe uff de Sickinger Heh schun in de Gechend rumstehe. So e "Windkraftanlage" is jo werklich e Mordssach. Do werd erscht mol so e ganz langer Mascht uffgestellt, unn dann werre owwe drei so Fliechle feschtgemacht, die sich drehe kenne. Unn wenn de Wind so richtich fescht bloost, drehe sich owwe die Fliechle unn unne kommt de elektrische Strom raus. Im Stadtrat hann die eene gemeent, es wär doch sicher richtich, wenn ma erscht iwwerlehe dät, ob mir so Mordswindmiehle in unserm Stadtgebiet wolle unn wenn jo, wo ma se uffstelle. Die annere hann gemeent, des hätt noch Zeit, ma misst sich desweje jetz noch net de Kopp verbreche.

Also mir hann jo in Zweebrigge schun mol so e Windrad gehatt drowwe uff de Wattwiller Heh newe emm Waldfriedhof. Wenn de Wind gang is, hann sich die drei Fliechle so e bissje mied gedreht unn so arich viel Strom is scheint's bei demm langsame Drullere net rauskomm. An emm scheene Dah nämlich, do hann se demm Ding die Fliechl gestutzt, unn seitdemm steht der Poschte leer unn alleen in de Gechend rum.

So e Windrad ohne Fliechl, des is wie e Katz ohne Schwanz. Do kann de Wind sich noch so arich anstrenge unn ganz fescht bloose - am leere Mascht do dreht sich nix.
Die Hauptsach an so re Anlach is halt doch de Wind. Wenn der net bloost, dann nitze die greeschte Fliechle nix. Desweje misst ma erscht mol gucke, ob's bei uns do Stelle gebbt, wo nägscht immer de Wind weht. Wenn nämlich eener sei Strom direkt vun so emm Windrad krächt, dann hätt der in seine Stuwwe nur Licht, wenn drauß de Wind bloost, unn mitte im spannendschte Krimi gäng de Fernseher aus, wenn de Wind uffheere deht zu bloose. De Karl hat schun bedauert, dass die Windräder do sich nur mit richtichem Wind drehe.

Es gebbt jo a noch annere "Windmacher". Leit, wo e Haufe um sich her mache, so dass ma ne als mol sahn muss: "Heer uff, unn mach net so viel Wind!" Wenn jetz eener was erfinne dät, damit sich die Windräder a drehe bei demm Wind, denne so manche Leit um sich her mache, dann breicht uns weche dere elektrische Versorchung fer die Zukunft iwwerhaupt net bang ze sinn. Do wäre die Umweltschitzer genauso zefriede wie die Leit im Stadtrat. Wenn's dann werklich mol e bissje eng werre dät, breichte se all nur e bissje Wind mache.

Emm Karl sei Fraa intressiert des mit denne Windkraftanlache iwwerhaupt nimmeh, seit se geheert hat: "De Udo kommt!" Sie is nämlich e richticher Fän vum Udo Jürgens. Jedesmol, wenn der singt "17 Jahr, blondes Haar" verrollt se die Auche, unn wenn er singt "Merci Cherie", do macht se e Gesicht, als wenn der Udo mit demm Lied nur sie meene kennt. Der Udo kommt im Herbscht - wenn widder "Euro-Klassik" is - noh Zweebrigge unn singt in de Westpalzhall. Er hat jo arich lang gebraucht, bis er Zweebrigge gefunn hat, de Udo. Er is jo a schun nägscht siebzich Johr alt - awwer des steert emm Karl sei Fraa unn die annere Zweebrigger Fäns net. Mir freie uns, dass er kommt.Eier Willem - RON - RHEINPFALZ ONLINE, Mittwoch, 30. Jan , 03:45 Uhr